Երկօրյա աշխատանքային քննարկում ՀՀ Շիրակի մարզում
«Հակակոռուպցիոն քաղաքականություն և բարեվարքություն» անվանումով հանրային իրազեկման հանդիպումների շրջանակում Կոռուպցիայի կանխարգելման հանձնաժողովի, ՀՀ արդարադատության նախարարության և ԱՄՆ ՄԶԳ «Հայաստանի բարեվարքություն» ծրագրի ներկայացուցիչները երկօրյա այցով գտնվել են ՀՀ Շիրակի մարզում։
Գյումրիում՝ Շիրակի տարածաշրջանային պետական քոլեջ կազմակերպված հանդիպմանը մասնակցել են Շիրակի հանրակրթական, նախնական մասնագիտական (արհեստագործական) և միջին մասնագիտական կրթական ծրագրեր իրականացնող ուսումնական հաստատությունների մանկավարժներ և աշակերտների ծնողներ։
Որպես բանախոսներ՝ հանդես են եկել Հանձնաժողովի կրթական, հանրային իրազեկվածության ծրագրերի և մոնիթորինգի վարչության աշխատակիցները և ԱՄՆ ՄԶԳ «Հայաստանի բարեվարքություն» ծրագրի ներկայացուցիչները։
Կոռուպցիայի կանխարգելման հանձնաժողովի, ՀՀ արդարադատության նախարարության աշխատակիցները և ԱՄՆ ՄԶԳ «Հայաստանի բարեվարքություն» ծրագրի ներկայացուցիչները հյուրընկալվել են նաև ՀՀ Շիրակի մարզպետարանում, որտեղ հանդիպել են մարզի խոշորացված համայնքների համայնքային ծառայողների և մարզպետարանի աշխատակազմի ներկայացուցիչների հետ։
Հանդիպումների ընթացքում ներկայացվել է ՀՀ կառավարության հակակոռուպցիոն քաղաքականության հիմնական ուղղությունները, կոռուպցիայի դեմ պայքարի ինստիտուցիոնալ համակարգի, բարեվարքության համակարգի ներդրման, Հանձնաժողովի գործունեության, կոռուպցիայի դեմ պայքարի գործում կատարված աշխատանքների և ծրագրերի վերաբերյալ տեղեկատվություն:
