Կիևում կայացած «Զրո կոռուպցիա» համաժողովին ներկայացվել է կոռուպցիայի դեմ պայքարի հայաստանյան բարեփոխումները. տեղի է ունեցել փորձի փոխանակում հայ և ուկրաինացի գործընկերների միջև
2021 թվականի հունիսի 4-ից 11-ը Հայաստանի կոռուպցիայի կանխարգելման հանձնաժողովի նախագահ Հայկուհի Հարությունյանը և հանձնաժողովի անդամ Լիլիթ Ալեքսանյանն աշխատանքային այցով գտնվել են Ուկրաինայի Հանրապետությունում, որտեղ մասնակցել են «Ժողովրդավարությունը գործողության մեջ. զրո կոռուպցիա» խորագրով միջազգային բարձր մակարդակի համաժողովին:
Համաժողովին մասնակցնել են ԵՄ բարձրաստիճան պաշտոնյաներ, ԱՄՆ սենատորներ, անդրազգային իրավապահ մարմինների աշխատակիցներ և հակակոռուպցիոն խնդիրների ուղղությամբ աշխատող ակնառու ակադեմիկոսներ, որոնք ի թիվս այլ հարցերի՝ ուսումնասիրել են ժողովրդավարության հիբրիդային սպառնալիքների լուծումները, մասնավորապես՝ ապատեղեկատվությունը, փողերի լվացումը և օլիգարխների կողմից ժողովրդավարական պետությունների անվտանգությանն ուղղված սպառնալիքները։
Հայկուհի Հարությունյանը՝ որպես համաժողովի հիմնական բանախոսներից, ներկայացրել է Հայաստանի փորձը, մարտահրավերներն ու առաջընթացը կոռուպցիայի դեմ պայքարի ոլորտում և նշել, որ 2018 թվականի իշխանության խաղաղ փոխակերպումից հետո Հայաստանը որոշում է կայացրել գույքի հայտարարագրման համակարգը դարձնել արդյունավետ գործիք երկրում կոռուպցիան կանխելարգելելու համար։
«2019թ. նոյեմբերին ՀՀ կառավարությունը ստեղծեց պետության համար բոլորովին նոր ինստիտուտ՝ Կոռուպցիայի կանխարգելման հանձնաժողովը, որին լիազորություն տրվեց կանխելու երկրում համակարգային կոռուպցիան: Ես այն համոզմանն եմ, որ Հայաստանն ունի գույքի հայտարարագրման ամենաարդյունավետ համակարգերից մեկը, որը կարող է օրինակ ծառայել այլ երկրների համար»,- նշել է Հայկուհի Հարությունյանը և հավելել, որ Հայաստանում պետական պաշտոնյաները շատ մանրակրկիտ են մոտենում գույքի հայտարարագրման գործընթացին:
«Հանձնաժողովի ստեղծման պահից մեր ուշադրության կենտրոնում էին նաև ՀՀ բարձրագույն դատական խորհրդի և Սահմանադրական դատարանի անդամների կողմից ներկայացված հայտարարագրերը: Հանձնաժողովի կողմից վերլուծվել է գույքի շուրջ 250 հայտարարագիր և ձեռնարկվել են համապատասխան գործողություններ»,-ասել է Հարությունյանը: Նա՝ որպես մասշտաբային բարեփոխումների մաս, նշել է, որ քաղաքական կոռուպցիայի դեմ պայքարում ՀՀ կառավարությունը որդեգրել է այլ ուղիներ ևս, որի շրջանակում 2022 թվականից Հանձնաժողովը հայտարարագրման համակարգ կստեղծի նաև կուսակցությունների և դրանց անդամների համար։
«Ըստ այդմ՝ մեր երկրում քաղաքական կուսակցություններին ֆինանսավորողները պարտավոր են հայտարարագրել իրենց ունեցվածքը, եկամուտները, մասնաբաժինները և ցանկացած կապեր ու հարաբերություններ բիզնեսի հետ, ինչպես անում են պետական պաշտոնյաները։ Բացի այդ, կուսակցության ֆինանսավորումն ու եկամտի աղբյուրը հատուկ մեթոդաբանության միջոցով կվերահսկվի Հանձնաժողովի կողմից: Մենք կենտրոնացրել ենք մեր ջանքերը, որպեսզի օր առաջ ներդրվի հայտարարագրման էլեկտրոնային համակարգը և մեզ տեսանելի լինի ողջ պատկերն այնպես, որ քաղաքական ազդեցությունն ու քաղաքական ուժը երբեք չմիաձուլվեն բիզնեսի հետ՝ երկրում ստեղծելով օլիգարխիկ համակարգ: Մեր նպատակն է կանխել երկրում հնարավոր օլիգարխիկ կառավարումը, բայց նաև խրախուսել կուսակցությունների անդամներին՝ ծառայելու հանրային շահերին»,- հավելել է Հայկուհի Հարությունյանը:
