Կոռուպցիայի կանխարգելման հանձնաժողովի գործունեությունը ներկայացվել է Հակակոռուպցիոն քաղաքականության խորհրդի հերթական նիստում

Կոռուպցիայի կանխարգելման ոլորտում Կոռուպցիայի կանխարգելման հանձնաժողովի (այսուհետ՝ Հանձնաժողով) իրականացրած աշխատանքներին էր նվիրված ապրիլի 2-ին Կառավարությունում տեղի ունեցած Հակակոռուպցիոն քաղաքականության խորհրդի (այսուհետ` Խորհուրդ) հերթական նիստը, որը գլխավորում էր ՀՀ վարչապետ Նիկոլ Փաշինյանը։

Հանձնաժողովի նախագահի պարտականությունները կատարող Մարիամ Գալստյանը ներկայացրել է 2024 թվականի ընթացքում Հանձնաժողովի գործունեության բոլոր ոլորտներում իրականացված աշխատանքները, գրանցած արդյունքները, առկա մարտահրավերները: Մասնավորապես, Մ. Գալստյանը ներկայացրել է կոռուպցիոն ռիսկերի գնահատման և կառավարման համակարգում պիլոտային մեթոդաբանությունների գործարկման արդյունքները, հանրային պաշտոն զբաղեցնող անձանց, հանրային ծառայողների բարեվարքության համակարգում տեղ գտած զարգացումները, բարեվարքության ուսումնասիրությունների համակարգում օրենսդրական փաթեթի ընդունման և դրա հետ կապված ընդհանուր միտումները:

Մ. Գալստյանը ներկայացրել է նաև հայտարարագրերի վերլուծությունների, դրանց ներկայացման գործընթացի նկատմամբ իրականացված վերահսկողության և վարչարարության արդյունքները և միտումները, ինչպես նաև անդրադարձ է կատարել կուսակցությունների ընթացիկ ֆինանսական գործունեության վերահսկողության ուղղությամբ իրականացված՝ 2024 թվականին ձևավորված իրավակիրառ պրակտիկայի արդյունքների և դրանցից բխող օրենսդրական փոփոխություններին։ Ներկայացվել է Հանձնաժողովի գործունեությունն ամբողջապես թվայնացնելու, վերլուծական մոդուլների ներդրմամբ աշխատանքների արդյունավետության բարձրացման տեսլականը:

Scroll to Top